Auf Kommentar antworten 

A S.A. de Xestión do Plan Xacobeo foi premiada co galardón correspondente ao ano 2011 na categoría de “Institucións Públicas”, concedido polo xurado dos premios “OPC España” da Federación Española de Asociacións de Empresas Organizadoras de Congresos. O premio outorgouse “pola promoción turístico-cultural dos Camiños de Santiago que a S.A. de Xestión do Plan Xacobeo leva a cabo”, segundo consideración do xurado.

O premio recollerao en nome da S.A. de Xestión do Plan Xacobeo a súa xerente, na cerimonia de entrega que terá lugar o día 17 de febreiro ás 13.00 h., en Girona, no transcurso do XXV Congreso Nacional 2012 que se celebrará nesta cidade catalá entre os días 15 e 18 de febreiro. 

O congreso deste ano conmemora o 25 aniversario da OPC España, organización que ten sede en Madrid e que abrangue a case totalidade das asociacións do sector que existen nas diferentes comunidades autónomas, así como a máis dun cento de empresas federadas e máis de duascentas colaboradoras dedicadas ao sector turístico congresual, un sector moi relevante e que está a ter unha gran proxección.  Os seus fins, definidos nos estatutos, son “defender e promover os intereses profesionais dos asociados, fomentar a calidade dos servizos prestados polas empresas e fomentar a unión profesional en temas de común interese”.